Гиöжöдсö лöсьöдiс Ольга Николаевна Канева

Быттьöкö неважöн на пасйим 180 вося тшупöда пас дона Изьва школанымлысь… А колис нин бара дзонь во. И со тöв шöр тöлысся 30 лунö миян велöдчысьяс, асывсянь мичаа вöччöмöн да кыпыд руöн, локтiсны школаö, медым чолöмавны сiйöс 181-öд вося Чужан лунöн. А велöдысьяс уна водзвыв нин мöвпалiсны, кыдз эськö бурджыка да интереснöйджыка висьтавны челядьлы школанымлöн öнiя да важъя олöм-вылöм йылысь,  öд историяыс сылöн збыльвылас зэв озыр.

Торъя пöсь сьöлöм кылöмъясöн волiсны муса велöдчанiнö выпускникъяс, найö, кодъясöс колльöдiс школа ыджыд олан туйö 1955, 1965, 1975, 1985, 1995, 2005 воясö. Ыджыд аттьö окота шуны тайö позянлунсьыс школаса вöвлöм велöдысьяслы: Вера Дмитриевна Рочевалы, кодлöн юрын и чужлiс  мöвпыс öтувтлыны выпускникъясöс школа пытшкын кöть нин öтчыд дас вонас, и, дерт жö, Пётр Ефимович Терентьевлы да Илья Тимофеевич Чупровлы, кодъяс уна вын сетiсны, медым Вера Дмитриевнакöд тшöтш котыртны тайö гажсö. И зэв бур, мый тайö традициясö водзö нуöдöны Изьва школаса öнiя веськöдлысьяс да педагог-организаторъяс.

А миян талунъя велöдчысьяс коми кыв урокъяс вылын, а кодсюрö и гортын, видлiсны лöсьöдны чужан велöдчанiнлы да муса велöдысьяслы сиöм кывбуръяс.  Ичöтджык  ныв-зон босьтчылiсны тайö уджас медводдзаысь на, но сетiсны став сьöлöмнысö кывбуръяс артмöдöм вылö. Вöзъям лыддьыны öткымын кывбур да лоам зэв радöсь, юксьыштанныд кö асланыд мöвпъясöн челядьлöн уджъяс йылысь.

Канева Евгения, 10 «б» класс:

Менам школа медся дона,

Кӧть и пӧрысь жӧ нин ёна.

Радейта ме сійӧс зэв,

Быдлаö пукта ассьым пев.

Тані уна велӧдчысьыс,

Абу этша велӧдысьыс.

Выль чужӧм быдлун локтӧ воча –

Ставсӧ юрад тэчан шоча.

Ӧдйӧ лэбӧны тай вояс,

Ӧдйӧ узьсьӧны тай войяс…

Быдӧн коляс ассьыс школа,

Сӧмын, чайта, лоас дона,

Сьӧлӧм йиджны кутас пыр,

Ньӧжйӧн шуны: «Но жӧ, пыр!

Видзӧдлы кӧть тыті, таті,

Думнад школа дорті маті

Ветлӧдлан да чайтан пыр:

Ӧтчыд сюйла кӧть жӧ ныр!»

Тӧда, овлӧны тай здукъяс,

Чайтсьӧ кор: но и урокъяс!

Дӧнзьӧдісны менӧ дзик

Ставӧн: ёртъяс, дажӧ сикт!..

Пыр жӧ тайӧ здукыс кольӧ,

Уна во мысти тай нольӧ

Бара сьӧлӧм: «Пыравлы жӧ,

Ставыс вежсис, али сідз жӧ?»

Талун сылӧн чужанлуныс,

Сиа, юръяс мед эз пуны,

Ёртъяс велӧдчисны бура

И эз шуны: «Талун дура!»

Ӧтчыд кӧть, но казьтышт бура

Ассьыд школа, и ло пыр юра…

А ме чайта: школа дона,

Кӧть и пӧрысь жӧ нин ёна.

Радейта ме сійӧс зэв,

Быдлаö пукта ассьым пев.

Репина Карина, Чупрова Надежда, Ануфриева Валерия, Калимов Анатолий, 11 «а» класс:

Менам мада велöдысь,

Сьöкыд туйтi нуöдысь!

Ошкан уна тöдöмысь,

Быд лун менö садьмöдысь.

 Тэ менам медбур ёрт.

Сетан, мый мен колана.

Лоан тэ пыр сьöлöмам,

Олöм восьтысь морт.

Тэ зэв ыджыд сьöлöма!

Та понда ме радейта,

Та понда ме донъяла –

Тайöс збыльысь висьтала!

Терентьева Елена, Попова Анастасия, Попов Егор, 11 «а» класс:

Квайт арöсöн мунi

Изьва школаö ме.

Дас öтикöд во нин

Ветла сэтчö ме.

Лыддьысьны да гижны,

Йöктыны да сьывны,

Рисуйтны да ворсны

Велалi ме сэн.

Велöдысьяс югдöдöны

Миянлысь сэн юр.

Тöждысьöны найö,

Мед ставыс вöлi бур.

Филиппов Всеволод, 6 «а» класс:

Велöдчöмыд вайö бур,

Югдöдö вед сiйö юр.

Быд лун тöдмала выльтор:

Со Египет, со Амур,

Сэн Бразильскöй карнавал,

Питер, Канны, фестиваль –

Тайöс тöдны колö ставлы,

Медым му кузя восьлавны.

Чужанiнöй менам Коми!

Коми - шань да мелi кыв.

Тайöс велöда ме ставсö

Изьва школаын дзик пыр.

Чолöмалам Чужан лунöн,

Сиам тэныд кыпыдлун,

Ов да сöвмы, Изьва школа,

Вынсьöд ассьыд вежöр туй!

Мартынюк Илья, 6 «б» класс:

Менам школа медся дона,

Менам школа медся бур!

Татчö велöдчыны вола.

Сиа шудлун да быд бур!

Сметанин Денис, 6 «б» класс:

Миян школа медся бур,

Тон школалöн Чужан лун.

Сылы тырö уна во,

Водзö сы мый дыра ов!

Кожевина Ксения, 6 «б» класс:

Ме радейта зэв школаöс

И сэтчö быд лун вола,

А школа дорын тола,

И сэтöн ворсам ми.

А перемена бöрын

Ми урок вылö мунам,

И сэтöн тöдöмлунъяс

Ми босьтам пырысь-пыр.

Канева Мария, Витязева Юлия, Тимонина Наталья, Сапьяник Надежда, 11 «а» класс

Мелi велöдысьяс,

Сьöлöмшöръяс!

Донаöсь миян тi!

Олöмö нуöдысьясöн

Лыддям тiянöм ми!

Ловныд тiян вына,

Сьöлöмныд пыр пым,

Тöдöмлунныд уна,

Оз кынты сiйöс лым.

Тiян велöдöм оз вун,

Колö миянлы быд лун.

Тöдöмлунным лоас уна –

Олöмын ми ылö мунам!

http://www.izhmaschool.ru/news/noshta_otchyd_musa_shkola_jylys/2015-02-02-661