Кымын ӧдйӧ Коми муын лёкмӧ олӧмыс, сымын ӧдйӧджык, буракӧ, кыпӧдӧны ассьыныс чинсӧ кутшӧмсюрӧ веськӧдлысьяс. Тӧдчӧ тайӧ «Коми войтыр» юрнуӧдысьлӧн Съезд бӧрся воськовъяс серти.
Сiйӧ став коми йӧзсянь виччысьтӧг ошкис Путинлысь вежсьӧмяссӧ Оланподулӧ. Кыдзи позьӧ йӧзлысь юасьтӧг «Коми войтырлӧн» юрнуӧдысьлы став Роч му пасьта татшӧм торсӧ висьтавны? Гижи сылы та йылысь воссьса гижӧд (открытое письмо).
Ӧльӧш телефон пыр меным шуис: «Ме ӧд ас помла гижи, эг став коми йӧз нимсянь».
Думыштi: «Лёк жӧ маршал, кодi салдат пыдди ӧтнас пищальӧн мунӧ тыш вылӧ. Но гашкӧ том на да тӧлкмас?»

А Ӧльӧш, кажитчӧ, сӧвсем юрсӧ воштiс. Эз на гиж, кыдз кӧсйысис телефон пыр, менам гижӧд вылӧ восьсса ӧтвет. А чуймӧдiс нин коми йӧзсӧс нӧшта на ёна: кутіс гижны приказъяс.

Армияын маршалъяс приказъяс гижӧны, Канмуын чина йӧз приказъяс гижӧны, но общественнӧй движениеын, кӧнi ставыс вӧчсьӧ сёрни бӧрын кипасалӧмӧн, татшӧм дивӧсӧ эг на аддзыв. Общественнӧй ӧтмунӧмын сы серти приказ колӧ, кыдз телегалы витӧд гӧгыль. И Уставас гижӧма, мый приказ гижсьӧ сотрудникъяслы.

А кутшӧм сотрудникъяс эмӧсь общественнӧй ӧтмунӧмын, кор уджалӧны дон босьтӧг?
Ассьыс вежысьяссӧ Ӧльӧшлы колӧ кипасалӧмӧн Исполком вылын бӧрйыны, а сiйӧ приказъясӧн пукталӧ колана йӧзӧс.

Ме ола ылын, сьӧд вӧр шӧрын. Гашкӧ Путин нин и танi Указ ли, вежсьӧм-реформа ли общественнӧй движениеяс йылысь примитiс. Но ме эг на кывлы. Сэтчӧдз нӧ Путин воис? Али Ольӧшлӧн юрыс пыр-пыр гӧгӧрмунiс? Ог тӧд, ёртъяс. 30 во нин уджала «Печора доръян комитетын», уна во уджалi «Изьватасын», ӧнi отсася, кыдз верма, «Вычегда доръян комитетлы», да «Стоп-Шиес» ӧтмунӧмлы, но татшӧм ДИВӦСӦ эг на аддзыв, эг на кывлы, эг на тӧдлы.

Кыдзи Съездлӧн делегат, лыддя, мый Ӧльӧш воштӧма визьсӧ. А гашкӧ ме мыйкӧ ог тӧд? Выль визьыс кызь во нин Роч муын мунӧ: йӧзлысь юасьтӧг олӧмсӧ вежӧны, увлань юрӧн бергӧдӧны. Гашкӧ унджык йӧзыс лыддьӧны нин, мый тадзи и колӧ?!

Терень Микул