Вӧлі талун Коми войтырлӧн исполком чукӧртчӧм.

Дженьыда кӧ: 
Власть шуӧ, мый ставыс миян бур. Кор индӧны мый абу ставыс бур, шуӧны, мый ставыс Москва вӧсна, коді Комилы сьӧм оз сет, да лёк оланпасъяс (законъяс) вынсьӧдӧ. Чужӧ юалӧм: мыйла сідзкӧ колӧ миянлы татшӧм Москва?

Кузьджыка:
Сёритісны ёна коми кыв велӧдӧм йылысь. Власть бердса йӧз шуӧны — мый оланпас (закон) коми кыв велӧдӧмлы паныд вынсьӧдны миян госсоветын оз кутны. Но ёна кутіс шогсьыны, кор Коми войтырлӧн исполкомӧ пырӧдчысь висталіс, мый вынсьӧдасны кӧ оланпассӧ, чукӧртам выль съезд, кӧні госсовет бырӧдӧм йылысь юалӧм лэптам.

Министерство образования мырдӧн вӧчӧ мыжаӧн коми кыв бырӧдӧмын школаясысь директоръясӧс. Ставсӧ пӧ найӧ асьныс вӧчӧны, ми нинӧмын абу мыжаӧсь. Норасьӧй пӧ миянлы на вылӧ.

Быд коми кыв велӧдысьлы пӧ аддзам выль удж. Юалі: "мый вӧчны ӧнія студентъяслы, кодъяс кӧсйӧны лоны коми кыв велӧдысьясӧн? Вуджны-ӧ мӧд специальность вылӧ?" Шуисны, мед пӧ велӧдчӧны водзӧ. Чужӧ юалӧм: мыйла сідзкӧ ӧнія велӧдысьяссӧ вуджӧдӧны мӧд предметъяс велӧдны?

Кыптіс юалӧм Кӧрткерӧс районын детсад йылысь, кодӧс уна во нин оз вермыны вӧчны. Власть шуис, мый татшӧм садйыс вывті дона сувтӧ, да Москва пӧ деньгасӧ оз сет та вылӧ. Челядь мед гортаныс пукалӧны ӧтнанӧн. Крымӧ веськыд туй да ӧти тӧлысь вылӧ ыджыд стадионъяс коланаджыкӧсь.

Ёна кӧсйӧны вӧчны коми кыв велӧдӧм сӧмын кӧсйӧм серти сы вӧсна, мый сійӧ абу чужан кыв Коми муын олысьяслы. Чужӧны юалӧмъяс: мыйла английскӧй велӧдӧм, коді дзик некодлы Коми муын абу чужан кыв, оз сетны тадз жӧ бӧрйыны? Мыйла комияслы оз сетны бӧрйыны не велӧдны роч кыв, коді налы абу чужан кыв? Мыйла оз кӧсйыны быдтыны куим кыв тӧдысь йӧзӧс Коми муын?

Мыйла колӧ миянлы Москва, коді босьтӧ ставсӧ миян муысь? Гашкӧ корны бӧр колӧ мыйкӧ?

Алексей Иванов

фото Павла Степанова