Коми войтырлӧн 12-ӧд съездвывса делегатъяс дорӧ шыӧдчӧм 
Коми войтырӧн бӧрйӧм пыдди пуктана коми йӧз!

Ми, "Доръям асьнымӧс" коми ӧтувсаяс, вывті сюся да майшасьӧмӧн видзӧдам, кыдзи дасьтысьӧны локтан съезд кежлас. И синмад шыбитчӧ со мый. Миян видзӧдлас серти, съезд котыртысь- нуӧдысьяс кежисны съездлӧн медшӧр могсьыс да туйвизьсьыс.

Ӧти-кӧ: дзик нин ковтӧг чинтӧмаӧсь съезд вылӧ локтысь лыдсӧ. Шуам, Изьваса "Коми войтыр" петкӧдчӧмлӧн президиумӧ пырысь да "Миян Ижма" ӧтуввез котыр нуӧдысь ачыс вӧзйысьӧма съезд вылӧ. Ас тшӧт вылӧ локны весиг дась. Унаысь шыӧдчылӧма и меставывса , и республикаса "Коми войтыр"-лӧн исполкомъясӧ да ставыс дзик весьшӧрӧ. Чукӧртчан залыс пӧ ичӧт(!!!).

Ыджыдджыкин вужвойтырлӧн чукӧртчылӧм вылӧ юркарын абу нин, буракӧн, сюрӧма?! Татшӧм ногӧн жӧ и Сыктывкарса конференция нуӧдӧма вӧлі. Сэки , весиг, частнӧй видзысьясӧс медалӧмаӧсь, кодъяс список серти сӧмын и лэдзалісны. Ӧткымын журналистӧс да и прӧстӧй кывзысьясӧс эз лэдзны: залыс пӧ ичӧт(!!!). А вайӧдӧм кывзысьысь бюджетникъяс, кодъясӧс список серти лэдзалісны, кыдз сӧмын стрӧкыс сюри, пырысьтӧм-пыр и муналісны. Залыд джынвыйӧ кушмис. "Ковтӧм" водзмӧстчысьяс да журналистъяс эз веськавны. Мыйысь нӧ татшӧмасӧ полӧ вужвойтырысь локтӧм- пуктӧм власьть?! 

Мӧд-кӧ : съезд нуӧданногыс дзик нин ӧткодь карса конференция нуӧдӧмкӧд. Миянлы вӧзйӧны кывзыны докладъяс и дзик пыр бӧрйыны ӧтмунӧмлысь выль Президиум, исполком, веськӧдлысьӧс. Доклад кузя сёрнитӧмтӧг, сійӧс видлалӧмтӧг да донъялӧмтӧг; выль исполкомсаяслысь да веськӧдлысьлысь кандидатураяс видлавтӧг...И дзик пыр , сэсся, делегатъясӧс секцияясӧ йӧртӧм. Мед сэсся сэн и "соборуйтӧны", мед дӧжналӧны кыв, культура, вӧр-ва видзӧм. Юклы да ыджыдав! А бӧрвыв- Коми Республикаса юралысь дорын кыпыд паныдасьлӧм ( сӧмын бӧрйӧма йӧзлы, торъя корӧм серти). Мӧдӧд луннас, кор и исполком, и веськӧдлысь, и сійӧс вежысьыс лоасны нин бӧрйӧма, позьӧ и помшуӧмъяс да вӧзйӧмъяс видлалыштны, и гажӧдчыны рытӧдзыс.

Коймӧд-кӧ: Комиын да комилы юӧр сетанъяс дзик оз висьтавны локтан съезд йылысь, дасьтысян удж йылысь да и мунӧм нин бӧрйысьӧмъяс йылысь. Юркарын котыртӧм куим "гӧгрӧс пызанъяс" вылын ни "Коми му", ни "Юрган", ни "Коми гор" эз и петкӧдчывны. Волісны сӧмын медводдза вылас, и со, кыдзи сёрнитны корӧмаяс.

Бурногӧн кӧ, дзик нин оз тадзи ков нуӧдны вужвойтырлысь съездтӧ. Доклад кывзӧм бӧрын сійӧс донъявны, исполкомлысь, президиумлысь да и ставнас ӧтмунӧмлысь удж видлавны да донъявны- татшӧмногӧн колӧ вӧчны. Ӧтмунӧмӧн веськӧдлысь вылӧ некымын вӧзйӧм мортӧс кывзыны, бара жӧ видзӧдлыны, мыйӧн сійӧ локтӧ, мый вӧзйӧ да кыдзи вӧчны-уджавны мӧдӧ...Тадзи жӧ и вежысь кузяыс да и выль президиумӧ -исполкомӧ пырысьяс кузя. И сӧмын та бӧрти нин бӧрйысьӧмъяс нуӧдны! А мӧдӧд луннас позяс и секцияяс вылӧ юксьӧмӧн уджавны, и помшуӧмъяс вылын нускыштны, и юралысь дорӧ ветлыны, и сьывны-йӧктыны бурпӧт!

Миянлӧн эм куим вӧзйӧм съезд нуӧдӧм кузя: 
1.Аддзыны ыджыдджык зал вужвойтырлӧн чукӧртчылӧмлы, медым вермисны ставныс тӧрӧдчыны.
2.Воӧм делегатъяслы , медым ловзьӧдны ӧтмунӧмлысь уджсӧ, босьтны подувнас миянӧн вӧзйӧм съезд нуӧданногсӧ.
3.Коми кывъя да республикаса юӧртанъяслы повтӧг да восьсӧн петкӧдлыны съезд дасьтан уджсӧ, ӧтмунӧмлысь уджалӧмсӧ, важ да выль веськӧдлысьясӧс донъялӧмсӧ да с.в.

Пыдди пуктӧмӧн да бурӧ эскӧмӧн, "Доръям асьнымӧс" коми ӧтувсянь
Братенков Н., Удоратин Н., Вурдова Г., Елфимов С.