Красноборсаяс петкӧдлісны Ижмаса РДКын спектакль коми кыв вылын "Тадзи и колӧ, Юля!" Г.Юшковлӧн пьеса серти. Спектакльыс мунӧ изьва кыв вылын.

Действиеыс пьесаыслӧн 60-ӧд воясӧ коми сиктын. Юля, том ныв, олӧ Марпа мамыскӧд, коді зэв кӧсйӧ сетны нывсӧ верӧс сайӧ. Гриша - Юлялӧн жӧникыс, уджалӧ трактористӧн. Том йӧз, кыдз частӧ овлӧ, пинясьӧны, да бара миритчасны. 

Сиктса милиционер Йовлампей вайӧдіс Марпа дорӧ квартирантӧс, том зоотехник Альбертӧс.

Анатолий гӧгӧр герччӧны куим ныв: Юля (сійӧ ачыс радейтӧ Гришаӧс, но мамыс нин кӧсйӧ сетны квартирант сайӧ), Зиночка да Альбина, сійӧ куимнаныскӧд флиртуйтӧ, а бӧрас сиктсьыс пышйас. И зоотехник абу бур вӧлӧма, и мортыс тожӧ.

Пьесаас уна серам петкӧдлан сценаяс. Например, некымынысь мама-ныла керкаӧ пыравліс сиктса гадалка да вӧрӧжитысь Огапея. Медым сибӧдны ёрта-ёрт дорас Юляӧс да Альбертӧс, сійӧ предложитіс Марпалы нетшыштны кыкнаныслысь юрси, сотны, да юктавны сійӧн ӧта-мӧдсӧ.

Ставныс красноборсаяс зэв бура ворсісны, но медся нин бура, настӧящӧй артистка кодь меным кажитчис  Надежда Семяшкина, коді ворсіс Юлялысь мамсӧ.

Режиссёрыс спектакльыслӧн Терентьева Татьяна Прокопьевна.

Геройяс да коді ворсісны:

Марпа-Надежда Семяшкина,

Юля-Лидия Хозяинова,

Гриша-Константин Артеев,

Зиночка-Валерия Терентьева,

Йовлампей-Анатолий Семяшкин,

Альбина-ОксанаТерентьева,

Альберт-Владимир Артеев,

Огапея-Нина Осипова,

Самодеятельнӧй артистъясыс костын эм 3 велӧдчысь, 2 пенсионер, 2 ДКын уджалысь да  ООО Изьваын уджалысь.

Кыдзи висьталіс режиссёр Т. Терентьева, творческӧй коллективыс шусьӧ  "Кыськӧ тай эмӧсь". 24 во нин руководитӧ котырнас Татьяна Прокопьевна. Быд во зільӧны пуктыны ӧтик выль спектакльӧн. Сцена вылысь йӧз аддзылісны постановкаяс "Коді сэки ловйӧн коли", "Кыськӧ тай эмӧсь!", "Макар Васька - сиктса зон!", "Анисья"(Н.Белых) да мукӧдъяс. Но медсясӧ режиссёр радейтӧ Геннадий Юшковлысь пьесаяссӧ. Унджыксӧ ворсӧны коми кыв вылын - тадзсӧ лоӧ йӧзыслы матынджык да бурджык.

Спектакль - сійӧ став коллективыслӧн удж. Зэв поддерживайтӧны Татьяна Прокопьевнаӧс уджъёртъясыс Красноборскӧй СДКысь. 

Татшӧм ворсӧмнас красноборскӧй артистъяслы позьӧ и мукӧд сиктъясын да и карын ворсны. Жаль, мый ижмасаяс спектакль вылас эз унаӧн вӧвны. Колӧ смелджыка да паськыда вӧчны рекламаныссӧ. Зэв бур спектакль, сулалӧ!

Э.Братенкова